वीरगन्ज उपमहानगरपालिकाको लक्ष्यभन्दा बढी राजस्व संकलन
राजधानी संवाददाता
वीरगन्ज, १६ साउन
आयातनिर्यात बढी हुने मुलुककै प्रमुख वीरगन्ज भन्सार कार्यालयले गएको आर्थिक वर्षमा लक्ष्यअनुसारको राजस्व संकलन गर्न सकेन । कारण रह्यो, ६ महिने लामो मधेस आन्दोलन । तर, यही भन्सार कार्यालय अवस्थित र मधेस आन्दोलनको पनि केन्द्र रहेको वीरगन्ज उपमहानगरपालिकाले भने गएको आर्थिक वर्षमा राजस्व संकलनमा नसोचेको परिणाम हासिल गर्न सफल भएको छ ।
गत आवमा आधा वर्ष मधेसका आन्दोलनकारीले सहज ढंगले कार्यालय सञ्चालन गर्न नदिएको वीरगन्ज उपमहानगरपालिका कार्यालयले आफूले राखेको लक्ष्यभन्दा २१ लाख ९१ हजार ४ सय ५९ रुपैयाँ बढी राजस्व संकलन गरी सबैलाई चकित पारेको छ ।
उपमहानगरपालिकाले गएको आर्थिक वर्षमा कुल १३ करोड २९ लाख २७ हजार ३ सय १७ रुपैयाँ राजस्व संकलन गर्ने लक्ष्य लिएको थियो । तर, असार मसान्तसम्ममा कुल १३ करोड ५१ लाख १८ हजार ७ सय ७६ रुपैयाँ राजस्व संकलन गरी लक्ष्य पार गरेको वीरगन्ज उपमहानगरपालिका कार्यालयका प्रमुख कार्यकारी अधिकृत विष्णु कोइरालाले बताए ।
३ अर्बको ठूलो विकास योजना पनि यसै नगरमा चलिरहेको अवस्थामा त्यो योजनाका लागि उपमहानगरपालिकाले जुटाउनुपर्ने आन्तरिक रकम यहीँको राजस्व संकलनबाट जुटाउनुपर्ने ठूलो अभिभारा फत्ते गर्न कम सजिलो थिएन । ‘तर, सबै कर्मचारीको अथक प्रयासले परिणाम राम्रो आयो,’ उनले भने ।
गएको आर्थिक वर्षमा आयात निर्यात र जिल्ला अदालतसमेत ठप्प पारी मधेस आन्दोलन चर्किएको यस नगरीमा उपमहानगरपालिकाको स्थानीय कर लक्ष्य अनुसारको उठ्ने कल्पनै थिएन । तर, माघमा आन्दोलन खुकुलो भएपछि बढो लगन र सुझबुझका साथ राजस्व संकलनमा प्रमुख कार्यकारी अधिकृत सहितको टोली जुट्दा सफलता मिलेको वीरगन्ज उपमहानगरपालिकाका राजस्व शाखा प्रमुख मनोज कर्णले राजधानीलाई बताए । ‘आन्दोलन केही खुकुलो भएदेखि बिहान बेलुका नभनी सबैजना जुट्दा लक्ष्य चुम्न सकियो,’ उनले थपे ।
गएको आर्थिक वर्षमा साउनमा मात्र १ करोड ६२ लाख ६ हजार ८ सय २५ रुपैयाँ संकलन गरेको थियो । यसलगत्तै मधेस आन्दोलन सुरु भएपछि भदौमा एकैपटक सो रफ्तार घटेर १५ लाख ८६ हजारमा झरेको थियो । असोजमा २४ हजार, कात्तिकमा ९ हजार, हुँदै मंसिरबाट अलिअलि उकालो लाग्न थालेको राजस्व संकलन माघमा ४९ लाख रुपैयाँ माथि पुगेको हो । त्यसैगरी फागुनमा भने १ करोड ८५ लाख, चैतमा १ करोड ४८ लाख राजस्व उठेको थियो भने वैशाखमा १ करोड ३५ लाख, जेठमा २ करोड १४ लाख र वर्षभरको सबै महिनाभन्दा बढी असारमा एकै पटक ४ करोड ९२ लाख रुपैयाँ संकलन भएको उपमहानगरले जानकारी दिएको छ ।
राजस्व संकलनका लागि कर्मचारी नागरिकका घरघरमा दैलो ढकढकाउँदै पुगेको शाखा अधिकृत कर्णले बताए । संकलित करमा सबैभन्दा बढी स्थानीय करबाट संकलन भएको उनको भनाइ छ । वर्षौं उपमहानगरपालिकालाई तिर्नुपर्ने कर नतिरी लाखौं पुर्याउने करदातामध्ये नेसनल मेडिकल कलेज, पम्पम बिल्डिङ, निना कम्प्लेक्स र डा. अशोक शाहले भने अझै नगरपालिकाको ताकेतालाई बेवास्ता गरेको उपमहानगरपालिकाको भनाइ छ ।
नेसनल मेडिकल कलेजसँग मात्र ९ करोडभन्दा बढी राजस्व रोकिएको छ भने पम्प विल्डिङवालासँग २० लाख, निना कम्प्लेक्सवालासँग ८ लाख र डा. अशोक शाहसँग ४० लाख जति छ । बाँकी सानो तिनो कर नबुझाउने त हजारौं करदाता कर नतिरी बसेको राजस्व शाखाका प्रमुख कर्णले भने ।
उपमहानगरपालिकाले गएको वर्ष संकलन गरेको उक्त परिणामको राजस्व अघिल्लो आर्थिक वर्ष ०७१/७२ को बाहेक अघिल्ला सबै वर्षको भन्दा बढी पनि हो । अघिल्लो आवमा चाहिँ कुल १४ करोड ८ लाख ३९ हजार ५ सय ३८ रुपैयाँ संकलन भएको थियो । नत्र आव ०७०/७१ म १० करोड ३० लाख ३६ हजार ६ सय ७ रुपैयाँ मात्र संकलन भएको उपमहानगरपालिकाको तथ्यांकमा उल्लेख छ । उपमहानगरपालिकाको मूल राजस्व संकलनमा अझै पनि टाउको दुखाई भनेको व्यवसायी कर संकलनमा पनि हो । नगर क्षेत्रमा रहेका करिब ४ हजार व्यवसायीमध्ये नियमित कर बुझाउने भनेको कुल १२ सय जति मात्र छन् । नयाँ करदाता बढाउनुपर्ने उपमहानगरपालिकालाई प्रमुख चुनौती रहेको वीरगन्ज उपमहानगरपालिकाले बताएको छ ।
प्रकाशित मिति: २०१६-०८-०१ ०८:५५ |